حوار : عمر آدم
عرفنا بنفسك ؟
أنا إسمي إسلام الملاح ، 28 سنة ، مغني ، من القاهرة .
ليه إختارت الغناء الشعبي بعد ماكنت بدأت غناء كلاسيكي ؟
والله أنا زي أي حد بدأت أغني اللون إلي أنا بحبه والقريب لقلبي وكنا بنعمل حته في المدرسة و كورال الجامعة الناشيد الوطني والحاجات إلي بتبقي في طابور الصباح فا مكنش ينفع نغني فيها غير الحاجات الي هي بتاعت التراث وبتاعت مصر ودخلت الجامعة وبدأت أغني فيها حاجات الكلاسيك والدراما والرومانسية ونجحت فيه في 2017 بس بعدها حصلت حاجات كتير جداً خلتني إن أنا الموجه إلي ماشيه دلوقتي مش موجة الكلاسيك أو فكرة الأغاني الدراما محدش بينجح فيها غير الناس إلي هي سوبر ستار قليل لما تلاقي حد كده طالع عامل أغنية كده ونجحت والناس سمعتها فأنا عملت ده ونجحت فيه ولما حبيت أعملوا تاني ربنا مائردش نفس النجاح فاشوفت الدنيا ماشيه في إي دلوقتي لاقيتها ماشيه في الشعبي فابقيت أغني شعبي علي طول لأن ده بيبقي مصدر دخل أو هو ده الشغلانه بتاعتك لأن أنا بعيش وبقوم وبنام بتنفس غناء وده كل حاجه عندي .
إيه الأغنية الي شهرتك أكتر شر وراح ولا أغنية راح (قلبي هنعمل إي) ؟
أكتر أغنية شاهرتني راح (ياقلبي هنعمل أيه وبعدين) لأن هي كانت بداية وعملت 4 مليون في وقت مكنش فيه المليون أصلاً صعب أن أغنية عاديه تجبهم فا الحمد لله ربنا كرم فيها وبفضل ربنا أغنية شر وراح عملت نجاح بس مش زي أغنية راح .
تحب تقول إيه للفنان رضا البحراوي بما أنك عايز تشتغل معاه ؟
أخويا وحبيب قلبي الكبير إلي بموت فيه وبعشقوا جداً من وأنا صغير وهو أبن بلدي ونفسي أشتغل معاه جداً والأيام هتلف وهنشتغل مع بعض بإذن الله وأنا بحبه لأن هو مجتهد أوي أوي من وهو صغير وأنا عايش حياته وهو لسه بيبدء وطلع يغني فاشوفت المعاناة والجهد إلي هو عملوا عشان يوصل للي هو فيه ده فا قصة نجاحه أنا بحترمها جداً وكل إنسان فينا ليه طموح وأنا الحمد لله طموحي مش أني أبقي زي حد معين أنا طموحي ملوش سقف فاربنا يكرمني وأشتغل مع أخويا وحبيب قلبي رضا البحراوي .
كلمنا عن أغنية سالك مع الأوباش وإلي من بعدها حصلك التحول من الغناء الكلاسيكي إلي الغناء الشعبي ؟
بعد المشاكل إلي حصلت في الأغاني الكلاسيكي لاقينا إلي ماشي مش الكلاسيكي ولا التقاسيم ولا إي حاجه لاقينا إلي ماشي المهرجانات بس إلي بشكل غناء مش رص كلام ونفضل نزعق لاء فا أنا وأخويا وحبيبي طبعا أبو السيد المنتج إلي في ضهري قعدنا فكرنا هنعمل أيه طب يلا بينا نعمل مهرجانات ونختار أصوات كتير حلوه زي معتمد وزي أحمد عبده ومسلم وناس كتير جداً بس أحنا أختيارنا كان علي أحمد عبده لأن صوته يعتبر عكس صوتي هو صوته رفيع وأنا صوتي عريض شويه فا الموضوع هيطلع حلو مع بعضه والحمد لله طلع متناسق مع بعضه وحققت نجاح مكنتش متخيل إن النجاح ده يوصل لكده الحمد لله الناس كلها عارفه الأغنية والأسم أتعرف بعدها فاهي فعلاً عملت تحول في حياتي الأغنية دي .
المنتج أبو السيد وصاحب شركة الإنتاج Team 94 أتعلمت منه أيه وكان ليه الفضل فإنك تتعرف ؟
طبعاً ده أخويا وجدع جداً وفي ضهري وهو إلي في عز مانا كنت شايف الدنيا سواد سواد ومفيش أمل هو إلي وقف جنبي وقالي يلا نشتغل ويلا نكسر الدنيا وده علي المستوي الفني علي المستوي الإجتماعي هو أكتر حد جدع تتعامل معاه هو أبو السيد أكتر حد في الدنيا ممكن يبقي في ضهرك هو أبو السيد وأكتر حد في الدنيا ممكن يبقي سند ليك بعد ربنا ربنا يخليه ليا هو أخويا وبتعلم منه كل يوم وكصاحب محل براندات ملابس بتعمل منه حاجات كتير بتعلم منه أصول القياده ولما بشوفوا بيعامل الموظفين إلي معاه أزاي لما بشوفوا بيتعامل مع أخواته وصحابه إلي هنا وقت الشغل شغل ووقت الهزار هزار فأنا أتعلمت منه ده برضو فاهو أخويا وحبيبي وربنا يخليه ليا وأن شاء الله لأخر العمر مع بعض ومكملين .
إي أكتر حفلة عملتها وحسيت من خلالها أنك وصلت وبقيت مشهور ومعروف ؟
هو في حفلتين في حفلة عملتها في الجامعة أول ماعملت أغنية راح عملت حفلة في المجمع الطبي في جامعة طنطا الحفلة دي طبعا كان حضرها ناس كتير وشباب وبنات من الجامعات من كل حته في مصر فا الحمد لله لما طلعت وقدمت حسيت أن الأغنية معروفه في مصر كلها والناس بتتصور معايا وده بنسبالي جديد جداً وكنت مبسوط أوي والحاجة التانيه لما أتكرمت في مسابقة ميس نايل وطلعت غنيت متجيش عشان مفيش قدام الحضور كلهم والحمد لله أتكرمت يومها وخد جائزة علي الأغنية إن هي أحسن أغنية في 2021 الحمد لله أنا وأحمد عبده أتكرمنا يومها وغنيت أنا وهو الأغنية ده غير الأفراح والحفلات اليومية إلي الواحد الحمد لله بيحبها فالواحد بيشوف النجاح في عيون الناس وفي ودن الناس وهي بتسمع الأغنية فا الحمد لله الحفلات إلي بنحيها كل يوم والشغل إلي بنعملوا كل يوم ده إلي بيخليني بجد أكمل ومبسوط بالي أنا بعملوا حته في ناس بتنتقدني إن أنا بعمل أغاني شعبي بعد ماكنت بعمل كلاسيكي ودراما بس طبعا محدش عارف حاجه ومحطش نفسه في اللعبه فا الحمد لله دي كانت ناقلة كبيره جداً .
كلمنا عن أغنيتك الجديدة مريض زهايمر مع المطرب أحمد عبده ؟
طبعا بعد أغنية سالك مع الأوباش حبينا نكرر التجربة تاني مع أخويا أحمد عبده لأن وشنا حلو علي بعض فا الحمد لله قدرنا نسجل أغنية مريض زهايمر ونصورها كليب وهينزل علي أخر 11 بإذن الله وكان من قبلها عملت أنا وأحمد عبده كليب يلا باي باي والأغنية جابت نص مليون علي اليوتيوب وكسرت الدنيا فا الحمد لله مريض زهايمر أحنا بنسجلها وهتنزل أخر 11 وأتمني إن الكليب يعجبكوا لأن أحنا تعبنا فيه جداً وهيطلع حاجه تشرف .
لإيه أول مهرجان حضرته و أول جائزة وكان إحساسك إيه وقته ؟
أول مهرجان حضرته وأتكرمت فيه هو مهرجان ميس نايل 2021 طبعاً أتكرمت فيه علي الأغنية وخد جائزة وكنت مبسوط جداً وحسيت إن أنا الفترة الي فاتت دي والنجاح ده كله مرحش علي الأرض الحمد لله والدنيا ماشية زي ماربنا كاتب وزي مانا حاسبلها ودي حاجه أنا مبسوط منها جداً إن ربنا كرمنا وقدرنا ننجح في حاجه وسط الزحمة دي كلها وأتكرمت عليها الحمد لله .
تحب تهدي نجاحك وكل إلي بتحققه لمين ؟
هو مفيش غير شخص واحد إلي بهديلوا أي نجاح أو أي خطوة كبيرة أو مهمة تحصلي غير لروح أمي الله يرحمها وهي كانت هتبقي مبسوطة جداً وهي معايا وهي ربنا أخترها وأتوفت 2015 ومكنلهاش فرصة أنها تشوفني فأنا بهدلها أي نجاح في حياتي بعملوا لروح أمي .
About Author
